తోటాడ ఎంపీటీసీ, జెడ్పీటీసీ ఎన్నికల్లో ఓటుకు నోటు తిరస్కరణ

అనకాపల్లి జిల్లా, మునగపాక ఆర్థిక ఇబ్బందులు ఎదుర్కొంటున్నప్పటికీ ఓటు హక్కు విలువ విషయంలో రాజీపడకుండా ప్రజాస్వామ్య స్ఫూర్తిని చాటుకుంటున్నారు సామాజికవేత్త, సమాచార హక్కు చట్టం ఉద్యమకర్త బొడ్డేడ జగ్గఅప్పారావు. తోటాడ ఎంపీటీసీ, జెడ్పీటీసీ ఎన్నికల సందర్భంగా ఆయనకు తెలియకుండా తన కుటుంబ సభ్యుల్లో ఒకరికి ఒక రాజకీయ పార్టీకి చెందిన వ్యక్తులు రూ.500 అందించారు. ఈ విషయం తెలుసుకున్న జగ్గఅప్పారావు ఆ నగదును స్వీకరించకుండా సంబంధిత పార్టీ అభ్యర్థికి తిరిగి అందజేశారు. వ్యక్తిగతంగా ఆర్థిక ఇబ్బందులు ఉన్నప్పటికీ ఓటు విలువను డబ్బుతో ముడిపెట్టకూడదనే తన నిర్ణయాన్ని ఆచరణలో చూపించారు. 1998 నుంచి ఓటుకు నోటు దూరం 1998లో ఓటు హక్కు వచ్చిన నాటి నుంచి నేటి వరకు ఓటు కోసం డబ్బు తీసుకోకుండా ప్రజాస్వామ్య విలువలకు కట్టుబడి ఉంటూ ఓటుకు నోటుకు వ్యతిరేకంగా ప్రచారం చేస్తున్నారు.
గత పార్లమెంట్, అసెంబ్లీ ఎన్నికల సమయంలోనూ వివిధ సందర్భాల్లో సుమారు రూ.12,000 ప్రలోభపు నగదును తిరస్కరిచారు.
సుమారు 30 సంవత్సరాలుగా వినియోగదారుల హక్కులు,సమాచార హక్కు చట్టం, మానవ హక్కులు, పర్యావరణ పరిరక్షణ, మొక్కలు నాటడం, ఉచిత వైద్య శిబిరాలు, ఉచిత చెస్ శిక్షణ, తదితర రంగాల్లో ప్రజా చైతన్య కార్యక్రమాలు నిర్వహిస్తున్నారు. ముఖ్యంగా ఓటుకు నోటు వ్యతిరేకంగా ప్రజల్లో నిరంతరం అవగాహన కల్పిస్తున్నారు. ఓటు అనేది కేవలం వ్యక్తిగత హక్కు మాత్రమే కాదని, దేశ భవిష్యత్తును నిర్ణయించే పౌర బాధ్యత అని ఆయన పేర్కొన్నారు. ఓటర్లు డబ్బు, బహుమతులు, ఇతర ప్రలోభాలకు లొంగకుండా స్వేచ్ఛగా తమ ఓటు హక్కును వినియోగించుకోవాలని విజ్ఞప్తి చేశారు.

ఇదీ చదవండి :: యూపీలో విషాదం.. ట్రాలీని ట్రక్కు ఢీకొని ఐదుగురు మహిళల మృతి