‘ప్రతిసారీ ఫెయిల్.. ప్రతిసారీ కొత్త సాకు’.. రాహుల్ గాంధీపై సీఎం యోగి సెటైర్స్..

ఇంటర్నెట్ డెస్క్: ఉత్తరప్రదేశ్‌లోని గాజియాబాద్ రాజ్‌నగర్ ఎక్స్‌టెన్షన్‌లో గురువారం నిర్వహించిన ‘ప్రజాస్వామ్యాన్ని కాపాడండి.. అరాచకాన్ని తొలగించండి’ పాదయాత్రలో ముఖ్యమంత్రి యోగి ఆదిత్యనాథ్ పాల్గొన్నారు. ఈ కార్యక్రమంలో పశ్చిమ ఉత్తరప్రదేశ్‌కు చెందిన మంత్రులు, ఎమ్మెల్యేలు, ప్రజాప్రతినిధులు, బీజేపీ నాయకులు, పార్టీ పదాధికారులు పెద్ద సంఖ్యలో పాల్గొన్నారు.పాదయాత్ర అనంతరం నిర్వహించిన బహిరంగ సభలో సీఎం యోగి ఆదిత్యనాథ్ కాంగ్రెస్ పార్టీతో పాటు ప్రతిపక్ష కూటమిపై తీవ్రస్థాయిలో విమర్శలు గుప్పించారు. ముఖ్యంగా కాంగ్రెస్ అగ్రనేత రాహుల్ గాంధీని లక్ష్యంగా చేసుకుని వ్యంగ్యాస్త్రాలు సంధించారు. రాజకీయాల్లో ఎదురవుతున్న వైఫల్యాలకు బాధ్యత తీసుకోకుండా ప్రతిసారీ కొత్త కారణాలు వెతుక్కుంటున్నారంటూ విమర్శించారు. రాహుల్ గాంధీ పరిస్థితి పదేపదే పరీక్షల్లో ఫెయిలవుతూ, ప్రతిసారీ తన వైఫల్యానికి కొత్త సాకు చెప్పే గ్రామీణ విద్యార్థిలా తయారైందని ఎద్దేవా చేశారు.తన విమర్శలకు ఆసక్తికరమైన ఉదాహరణను జోడిస్తూ.. సీఎం యోగి ఓ కథను సభలో వివరించారు. ఒక గ్రామంలో ఓ విద్యార్థి పదేపదే పరీక్షల్లో ఫెయిల్ అవుతుంటాడని.. అయితే ప్రతిసారీ తన వైఫల్యానికి వేర్వేరు కారణాలు చెబుతుంటాడని పేర్కొన్నారు. మొదటిసారి ఫెయిలైనప్పుడు మాస్టారు తన జవాబు పత్రాన్ని మార్చేశారని చెబుతాడని.. రెండోసారి పరీక్షలో సిలబస్‌కు సంబంధం లేని ప్రశ్నలు వచ్చాయని సాకు చెబుతాడని వివరించారు. మూడోసారి పెన్నులో సిరా అయిపోయిందని.. నాలుగోసారి తన ముందు కూర్చున్న విద్యార్థి వేగంగా రాయడం వల్ల తన దృష్టి మరలిందని చెప్పుకుంటాడని వ్యంగ్యంగా వివరించారు. ఈ కథ ద్వారా రాహుల్ గాంధీ రాజకీయ వైఖరిని.. కాంగ్రెస్ పార్టీ వైఫల్యాలను ఎండగట్టే ప్రయత్నం చేశారు. ప్రతి ఓటమికి కొత్త కారణాలు వెతుక్కోవడం కాకుండా, వైఫల్యాలకు బాధ్యత వహించాలని ప్రతిపక్ష నేతలకు పరోక్షంగా చురకలు అంటించారు.

ఇదీ చదవండి :: కదిరి మున్సిపాలిటీ ఎన్నికల ఫలితాలు.